27-iyun – Matbuot va ommaviy axborot vositalari xodimlari kuni munosabati bilan O‘zbekiston Respublikasi Prezidenti Shavkat Mirziyoyev jurnalistlar, muharrirlar, noshirlar, axborot xizmatlari vakillari hamda barcha ijodiy va texnik xodimlarga samimiy tabrik yo‘lladi.

Davlat rahbari o‘z tabrigida zamonaviy dunyoda ommaviy axborot vositalarining o‘rni va ta’siri har qachongidan-da muhim ahamiyat kasb etayotganini ta’kidladi. Shu bois, haqqoniy axborot yetkazish, ijtimoiy ong va jamoatchilik fikrini shakllantirish borasidagi jurnalistlarning fidokorona mehnati Vatan posbonlarining jasoratiga qiyoslandi.

Prezident ommaviy axborot vositalari orqali jamiyat hayotidagi o‘zgarishlarni tezkor yoritish, islohotlarga oid g‘oya va tashabbuslarni keng jamoatchilikka yetkazish, inson huquqlari va erkinliklarini himoya qilish yo‘lida jurnalistlar fidoyiligi va kasbiy yondashuviga yuqori baho berdi.

Shuningdek, yurtimizda so‘nggi yillarda ommaviy axborot vositalari, xususan, xususiy sektor ulushining ortib borayotgani, foydalanuvchilar sonining keskin oshgani, yosh ijodkorlar va mustaqil studiyalar faoliyatiga davlat tomonidan e’tibor kuchaygani alohida e’tirof etildi. Aholining axborotga bo‘lgan konstitutsiyaviy huquqlarini ta’minlash, matbuot va so‘z erkinligini mustahkamlash, ayniqsa, yosh avlodni zararli axborotlardan himoya qilish borasidagi tashabbuslar yurtimizda boshlangan tub o‘zgarishlarning yaqqol namunasidir.

Prezident bayram munosabati bilan ommaviy axborot vositalari sohasida faoliyat yuritayotgan barcha mutaxassislarni, xususan, “Oltin qalam” milliy mukofoti g‘oliblari va davlat mukofotlariga sazovor bo‘lgan jurnalistlarni samimiy tabrikladi.

Shuningdek, bugungi jurnalistikaga zamonaviy axborot texnologiyalari, sun’iy intellekt vositalari joriy qilinayotgani ta’kidlandi. Bu esa, soha vakillaridan yanada yuqori darajadagi kasbiy saviya, doimiy yangilanish va global o‘zgarishlarga moslashuvchanlikni talab qilmoqda.

Davlat rahbari jurnalistlar kelgusida o‘z tajriba maktablarini yaratib, milliy jurnalistikamiz taraqqiyotiga katta hissa qo‘shishiga ishonch bildirdi. Shuningdek, ommaviy axborot vositalari sohasini har tomonlama qo‘llab-quvvatlash Yangi O‘zbekiston siyosatining doimiy ustuvor yo‘nalishi bo‘lib qolishini alohida qayd etdi.

Tabrik yakunida Prezidentimiz barcha OAV vakillariga sog‘lik, omad, ijodiy kuch-g‘ayrat va mas’uliyatli faoliyatlarida muvaffaqiyatlar tiladi.

https://president.uz/