KOREYALIK TALABALAR ‘XALQARO QISHKI MAKTAB’ DOIRASIDA O‘ZBEKISTONDA BO‘LDI

“Xalqaro qishki maktab — 2024” dasturi doirasida Koreyadan oltmish nafardan ziyod talaba yurtimizga keldi. O‘zbekiston va Janubiy Koreyaning ta’lim tizimidagi hamkorlik aloqalari natijasida Koreya Respublikasining Adju universiteti hamda Toshkent shahridagi Adju universiteti talabalari uchun yozgi va qishki mavsumlar uchun alohida ta’til dasturlari yo‘lga qo‘yilgan.

Delegatsiya a’zolari poytaxtimizdagi diqqatga sazovor joylar, xususan, Hazrati Imom majmuasi, O‘zbekiston tarixi davlat muzeyi hamda Toshkent teleminorasiga ekskursiya qildi. Yurtimizning boy tarixi, buyuk bobokalonlarimizning dunyo hamjamiyatiga qo‘shgan hissasi haqida qiziqarli ma’lumotlar berib borildi. Samarqand shahriga bo‘lgan sayohatda esa Registon maydoni, Amir Temur va Bibixonim maqbarasi, Shohizinda majmuasini ko‘rishdi.