Nukus davlat texnika universiteti Yevropa Ittifoqining Erasmus+ dasturi doirasida ikkita yirik xalqaro grant loyihasida ishtirok etish huquqini qo‘lga kiritdi.

1-loyiha: DIANA

Ayollarni qo‘llab-quvvatlash orqali qishloq turizmini rivojlantirish

DIANA loyihasi Qozog‘iston va O‘zbekistonda qishloq ayollarining imkoniyatlarini kengaytirishga qaratilgan. Loyiha doirasida ayollarning raqamli savodxonligi oshiriladi, ularni yashil iqtisodiyot asosida tadbirkorlik faoliyatiga jalb etish orqali qishloq turizmi yo‘lga qo‘yiladi va rivojlantiriladi.

2-loyiha: MECAS

Orolbo‘yi mintaqasida eko-informatika bo‘yicha magistrlik dasturlarini ishlab chiqish

MECAS loyihasi O‘zbekiston va Qozog‘iston oliy ta’lim muassasalarining salohiyatini oshirishga qaratilgan bo‘lib, Orolbo‘yi ekologik inqiroziga javoban zamonaviy eko-informatika yo‘nalishida magistrlik dasturlarini ishlab chiqishni maqsad qiladi.

Grant loyihalari amalga oshirilishi orqali universitetda yangi fanlar, malaka oshirish dasturlari, xorijiy treninglar va xalqaro hamkorlik imkoniyatlari kengayadi.