SAO PAULO UNIVERSITETIDA O’ZBEKISTON FAN, TA’LIM VA MADANIYATI NAMOYISH ETILDI

O’zbekiston davlat jahon tillari universiteti vakillari Braziliyaning Sao Paulo universitetiga tashrifi doirasida madaniy-ma’rifiy tadbirlar tashkil etildi. Tadbirda Sao Paulo universiteti talabalari, professor-o‘qituvchilar, shtat rasmiylari va keng jamoatchilik vakillari ishtirok etishdi.

Tadbir avvalida O‘zDJTU rektori prof. I. Tuxtasinov so‘zga chiqib ikki universitet o‘rtasidagi mustahkam aloqalar haqida so‘zlab o‘tdi. Shuningdek, O‘zbekiston ta’lim tizimidagi islohotlar va chet tillarning o‘qitilishi haqida so‘z yuritdi.

Tadbir davomida O‘zDJTU haqidagi videorolik namoyish etildi, hamda delegatsiya a’zolari tomonidan O‘zbekistonning buyuk shaxslari haqida ma’lumot berib o‘tildi.

Tadbirda O‘zbekiston madaniyati va urf-odatlariga oid ko‘rgazma materiallari namoyishi, O‘zbekiston bayrog‘i, milliy liboslar, so‘zana, hunarmandchilik namunalari (paxta gulli choynak-piyola, lagan, likopcha va laganlar, boboychalar, teriga chizilgan sur’at va b.) namoyish etildi. Ishtirokchilarga patir, shirinliklar, quruq mevalar taklif qilindi.

Shuningdek, yurtimizning tarixiy obidalari, madaniy yodgorliklari hamda ulug‘ ajdodlarimizning ilmiy-ma’rifiy merosi haqida hikoya qiluvchi “O‘zbekistonning bebaho merosi” deb nomlangan taqdimot, milliy hunarmandchilik va miniatyura namunalari ko‘rgazmasi o‘tkazilib, o‘zbek milliy kuy-qo‘shiqlari kuylandi. Milliy taomimiz bo‘lgan palov tayyorlanib, ishtirokchilarga tortiq etildi.