O‘zbekiston Respublikasi Prezidenti Shavkat Mirziyoyevning 7–8-sentyabr kunlari Serbiyaga amalga oshirgan rasmiy tashrifi ikki tomonlama munosabatlarni rivojlantirishda muhim voqea bo‘ldi. Belgradda o‘tkazilgan muzokaralar yakunida O‘zbekiston va Serbiya hamkorlikni yangi bosqichga olib chiqdi – ikki davlat rahbarlari Strategik sheriklik munosabatlarini o‘rnatish to‘g‘risidagi Qo‘shma deklaratsiyani imzoladilar.

Mazkur qaror nafaqat siyosiy ahamiyatga ega. U iqtisodiy aloqalar, investitsiyalar, savdo, hududlararo hamkorlik va xalqlar o‘rtasidagi aloqalarni kengaytirish uchun mustahkam asos yaratadi.

Alohida kelishuvlardan – strategik sheriklik sari

Prezidentlar ishtirokida ikki tomonlama qator hujjatlarni almashish marosimi bo‘lib o‘tdi. Ushbu hujjatlar mehnat mobilligi va migratsiyasi, xalqaro avtomobil yo‘lovchi va yuk tashuvlari, hududlararo hamkorlik, qishloq va suv xo‘jaligi, shuningdek, qishloq hududlarini barqaror rivojlantirish kabi yo‘nalishlarni qamrab oladi.

Shunday qilib, strategik sheriklik iqtisodiyot va transportdan tortib, gumanitar hamda hududlararo aloqalargacha bo‘lgan ko‘plab yo‘nalishlarda hamkorlikni rivojlantirishni nazarda tutadi.

Shavkat Mirziyoyevning rasmiy tashrifi O‘zbekiston Prezidentining Serbiyaga ilk rasmiy tashrifi bo‘lgani ham alohida ahamiyatga ega. O‘zbekiston tomoni ushbu tashrifni ikki tomonlama munosabatlar tarixidagi yangi bosqich sifatida baholadi.

Savdo va qo‘shma ishlab chiqarish uchun yangi imkoniyatlar

Muzokaralarning asosiy amaliy natijalaridan biri iqtisodiy hamkorlikning yangi ustuvor yo‘nalishlarini belgilash bo‘ldi.

Ikki davlatning 200 dan ortiq rasmiy va ishbilarmon doiralari vakillari ishtirok etgan qo‘shma biznes-forumda aniq loyihalar hamda o‘zaro savdo hajmini oshirish imkoniyatlari muhokama qilindi.

Tomonlar yetkazib beriladigan mahsulotlar turini kengaytirish va bojxona tartib-taomillarini soddalashtirish orqali o‘zaro savdo hajmini sezilarli darajada oshirishni maqsad qilgan.

Sanoat kooperatsiyasini rivojlantirish maqsadida 2026–2028-yillarga mo‘ljallangan Qo‘shma harakatlar rejasi qabul qilindi.

Istiqbolli yo‘nalishlar qatoridan quyidagilar o‘rin olgan:

• to‘qimachilik mahsulotlari;
• elektrotexnika buyumlari;
• avtomobil va sanoat ehtiyot qismlari;
• farmatsevtika mahsulotlari;
• meva-sabzavot mahsulotlarini qayta ishlash;
• dasturiy ta’minot;
• sun’iy intellekt sohasidagi loyihalar.

Bu faqat eksport va import hajmini oshirish haqida emas. Ikki davlat biznesi oldida ishlab chiqarishni mahalliylashtirish, qo‘shma korxonalar tashkil etish, investitsiyalarni jalb qilish va yangi bozorlarga chiqish uchun yangi imkoniyatlar paydo bo‘lmoqda.

Serbiya bilan munosabatlarni rivojlantirish O‘zbekiston uchun bir qator amaliy afzalliklarni taqdim etadi

Birinchidan, bu O‘zbekiston mahsulotlari eksportini kengaytirish va Yevropa bozori bilan savdo aloqalarini rivojlantirish uchun yangi imkoniyatlar yaratadi.

Ikkinchidan, serb kompaniyalari bilan hamkorlik farmatsevtika, sanoat, to‘qimachilik, IT va qishloq xo‘jaligi mahsulotlarini qayta ishlash kabi sohalarga texnologiya, investitsiya va tajribani jalb qilishga xizmat qilishi mumkin.

Uchinchidan, xalqaro avtomobil tashuvlari bo‘yicha kelishuvlar mamlakatlar o‘rtasidagi transport aloqalarini rivojlantirish, tovarlar va odamlarning harakatlanishini yengillashtirishga yordam beradi.

Mehnat mobilligi sohasidagi hamkorlik ham muhim ahamiyatga ega. U mehnat migratsiyasi masalalarida ikki davlat o‘rtasidagi hamkorlik uchun yanada tizimli asos yaratadi.

O‘zbekiston Markaziy Osiyoning jadal rivojlanayotgan bozorlaridan biri sifatida katta qiziqish uyg‘otadi

Iqtisodiy aloqalarning kengayishi serb biznesiga O‘zbekiston bozoriga kirish, qo‘shma ishlab chiqarishlarda ishtirok etish hamda mamlakatimizdan Markaziy Osiyoning boshqa davlatlari bilan hamkorlikni rivojlantirish maydoni sifatida foydalanish imkonini beradi.

Biznes-forumda Serbiya tomonidan, jumladan, Galenika, AbelaPharm, Goša FOM, Yumco va Luss Textile kabi kompaniyalar vakillari ishtirok etdi. Forum yakunida ikki tomonlama iqtisodiy kelishuvlar va savdo shartnomalari imzolandi.

Tashrif nafaqat iqtisodiy va siyosiy, balki ramziy ahamiyatga ham ega bo‘ldi

Belgrad shahridagi tadbirlar doirasida Oʻzbekiston Respublikasi Prezidenti Shavkat Mirziyoyevni Serbiyaning oliy davlat mukofoti – Katta zanjirli Serbiya Respublikasi ordeni bilan taqdirlash marosimi boʻlib oʻtdi.

Mazkur mukofot ikki davlat o‘rtasidagi ko‘p qirrali munosabatlarni mustahkamlashga qo‘shgan hissasi uchun topshirildi. O‘zbekiston Prezidenti ushbu mukofotni serb xalqining O‘zbekistonga bo‘lgan hurmati, tobora mustahkamlanib borayotgan do‘stlik va ikki tomonlama aloqalarni yanada rivojlantirish istagining ramzi sifatida baholadi.

Yana bir yorqin ramziy qadam — Belgrad shahridagi ko‘chalardan biriga “Toshkent” nomining berilishi bo‘ldi. Ikki davlat rahbarlari ushbu qaror munosabatlarning jadal rivojlanib borayotganini va endilikda strategik sheriklik darajasiga ko‘tarilganini ta’kidladi.

Munosabatlarda yangi bosqich

Shunday qilib, O‘zbekiston Prezidentining Serbiyaga tashrifi oddiy diplomatik tadbirdan ko‘ra kengroq mazmun kasb etdi.

Strategik sheriklik ikki davlat munosabatlarini uzoq muddatli va tizimli formatga olib chiqadi. Endilikdagi asosiy vazifa erishilgan kelishuvlarni amalda ro‘yobga chiqarish – savdo hajmini oshirish, qo‘shma ishlab chiqarishlarni yo‘lga qo‘yish, transport aloqalarini rivojlantirish, investitsiyalarni jalb qilish, IT va sun’iy intellekt sohalaridagi hamkorlikni kengaytirish, shuningdek, hududlar va xalqlar o‘rtasidagi aloqalarni mustahkamlashdan iborat.

O‘zbekiston va Serbiya uchun bu siyosiy o‘zaro anglashuvni aniq iqtisodiy loyihalar, yangi ish o‘rinlari, investitsiyalar va yangi bozorlarga aylantirish imkoniyatidir.

Imzolangan hujjatlarning amaliy ijrosi yangi strategik sheriklik yaqin yillarda ikki tomonlama munosabatlarga qanchalik katta ta’sir ko‘rsatishini belgilab beradi.

president.uz