2019 yil 2 iyul kuni Olmaota shahrida Yevropa Hamjamiyatining Erasmus+ dasturi ko‘magida “Yangi innovatsion texnologiyalar yordamida Markaziy Osiyoda oliy ta’limni  modernizatsiyalash” mavzusida xalqaro seminar o‘z ishini boshladi.

Xalqaro seminarda Italiya, Portugaliya, Bolgariya va Markaziy Osiyo davlatlari delegatsiyasi ishtirok etmoqda.

Tadbirning ochilish marosimida Qozog‘iston, Tojikiston, Turkmaniston, Qirg‘iziston va O‘zbekiston ta’lim vazirliklari vakillari qatnashishdi. 

O‘zbekistonning Olmaota shahirdagi bosh konsuli Abror Fatxullayev ham seminarning tantanli ochilish marosimida ishtirok etib, yurtimiz delegatsiyasi a’zolari bilan uchrashdi.

Seminarda Erasmus+ dasturi doirasida Markaziy Osiyo davlatlarida oliy ta’lim tizmini modernizatsiya qilish maqsadida olib borilayotgan loyihalar samaradorligi muhokama qilindi.

Jumladan, loyihada ishtirokchi davlatlari tomonidan oliy ta’lim tizimiga yangi innovatsiyalarni jalb qilish, ta’limni raqamlashtirish, o‘qitish metodikasi va baholashda ilg‘or tajribalardan foydalanish, inson kapitaliga yo‘naltirilgan innovatsion texnologiyalarni sohaga tatbiq etish bo‘yicha qilingan ishlar ko‘rib chiqildi.

Shuningdek, ishtirokchi davlatlarda OTM professor-o‘qituvchilari va talabalar o‘rtasida o‘quv jarayonlarida innovatsion ta’lim texnologiyalardan foydalanish bo‘yicha o‘tkazilgan so‘rovnoma natijalari ham muhokama qilindi.

Seminar o‘z ishini 5 iyulga qadar davom ettiradi.

Ma’lumot uchun, 2018/2019 o‘quv yilidan boshlab Oliy va o‘rta maxsus ta’lim vazirligi Yevropa Hamjamiyatining Erasmus+ dasturining “Yangi innovatsion texnologiyalar yordamida Markaziy Osiyoda oliy ta’limni modernizatsiyalash” loyihasida ishtirok etib kelmoqda. Loyiha doirasida TDIU, TATU va AnMIda raqamli ta’limni amalga oshirish bo‘yicha ishlar olib borilmoqda.